വനിതാ സംരംഭകർക്ക് വേണ്ടിയുള്ള സർക്കാർ പദ്ധതികൾ

ഇന്ത്യയിലെ വനിതാ സംരംഭകർ ബിസിനസ്സ് ലോകത്ത് കാര്യമായ പുരോഗതി കൈവരിച്ച് വരികയാണ്. ബിസിനസുകാരായി സ്വന്തമായി മുന്നോട്ട് വരാൻ ആഗ്രഹിക്കുന്നവർക്ക് പിന്തുണയും പ്രോത്സാഹനവും സർക്കാരുകൾ നൽകുന്നുണ്ട്. ഈ വളർച്ച സുഗമമാക്കുന്നതിന്, വനിതാ സംരംഭകരെ ശാക്തീകരിക്കുന്നതിന് വേണ്ടി ഇന്ത്യൻ സർക്കാർ പ്രത്യേകമായി രൂപകൽപ്പന ചെയ്ത നിരവധി പദ്ധതികളുണ്ട്. നിങ്ങൾ സ്വന്തമായി ഒരു ബിസിനസ്സ് തുടങ്ങാൻ ആഗ്രഹിക്കുന്ന ഒരു വനതയാണെങ്കിൽ, സ്റ്റാർട്ടപ്പുകൾക്ക് വേണ്ടി കൊണ്ട് വന്നിട്ടുള്ള സർക്കാർ പദ്ധതികൾ ഏതൊക്കെയാണെന്ന് നോക്കാം…

ദേനാ ശക്തി പദ്ധതി

ദേന ബാങ്ക് (ബാങ്ക് ഓഫ് ബറോഡയുമായി ലയിപ്പിച്ചത്) ആരംഭിച്ച ഈ സ്കീം കൃഷി, ഉത്പാദനം, റീട്ടെയിൽ ചെറുകിട സംരംഭങ്ങൾ, മൈക്രോ ക്രെഡിറ്റ് ഓർഗനൈസേഷനുകൾ എന്നീ മേഖലകളിലെവനിതാ സംരംഭകരെ സാമ്പത്തികമായി സഹായിക്കാൻ ലക്ഷ്യമിടുന്നു. കുറഞ്ഞ പലിശ നിരക്കുകളും പ്രത്യേക ഇളവുകളും ഉപയോഗിച്ച്, ഇത് വനിതാ സംരംഭകർക്ക് അവരുടെ ബിസിനസുകൾ പെട്ടെന്ന് തുടങ്ങുന്നതിനോ വിപുലീകരിക്കുന്നതിനോ ആവശ്യമായ സാമ്പത്തിക സഹായം നൽകുന്നു. ഈ സ്കീമിന് കീഴിലുള്ള വായ്പാ പരിധി Rs. 20 ലക്ഷം രൂപ.

സ്ത്രീ ശക്തി പാക്കേജ്

സ്റ്റേറ്റ് ബാങ്ക് ഓഫ് ഇന്ത്യ ആരംഭിച്ച ഈ സ്കീം, സംരംഭം തുടങ്ങാനോ നിലവിലെ സംരംഭം സ്കെയിൽ ചെയ്യാനോ ആഗ്രഹിക്കുന്ന വനിതാ സംരംഭകർക്ക് ഈട് രഹിത വായ്പകൾ വാഗ്ദാനം ചെയ്യുന്നു. അനുകൂലമായ പലിശ നിരക്കുകളും ഇളവുകളുള്ള യോഗ്യതാ മാനദണ്ഡങ്ങളും ഉള്ളതിനാൽ, വിവിധ വ്യവസായങ്ങളിൽ ഉടനീളം സ്ത്രീ സംരംഭകർക്ക് ഈ പദ്ധതി ഏറെ സഹായകമാണ്.

സെൻ്റ് കല്യാണി സ്കീം

സെൻട്രൽ ബാങ്ക് ഓഫ് ഇന്ത്യ അവതരിപ്പിച്ച ഈ സ്കീം വനിതാ സംരംഭകർക്ക് പ്രവർത്തന മൂലധനം, ഉപകരണങ്ങൾ വാങ്ങാം, മറ്റ് ബിസിനസ് ആവശ്യങ്ങൾ എന്നിവയ്ക്കായി സാമ്പത്തിക സഹായം നൽകുന്നു. മത്സരാധിഷ്ഠിത പലിശ നിരക്കുകളും ഫ്ലെക്സിബിൾ തിരിച്ചടവ് ഓപ്ഷനുകളും ഉപയോഗിച്ച്, സ്ത്രീകളുടെ സംരംഭകത്വ ആ​ഗ്രഹങ്ങൾ സാക്ഷാത്കരിക്കാൻ ഇത് പ്രാപ്തരാക്കുന്നു.

സ്റ്റാൻഡപ്പ് ഇന്ത്യ

ഉത്പാദനം, സേവനങ്ങൾ, വ്യാപാരം, കൃഷിയുമായി ബന്ധപ്പെട്ട പ്രവർത്തനങ്ങൾ എന്നിവയിൽ പുതിയ ബിസിനസ്സുകൾ സ്ഥാപിക്കുന്നതിന് എസ്‌സി/എസ്ടി, വനിതാ സംരംഭകർക്ക് ബാങ്ക് ലോണുകൾ ഉറപ്പാക്കുന്നതിനുള്ള ഒരു പദ്ധതിയാണിത്. 10ലക്ഷം മുതൽ 1 കോടി വരെയുള്ള വായ്പകളാണ് ലഭിക്കുക. സംരംഭം, പ്രൊഡക്റ്റ്, സർവ്വീസ്, വ്യാപാര മേഖല എന്നിവയിലേതും ആകാം.

മഹിളാ കയർ യോജന

മഹിളാ കയർ യോജന (എംസിവൈ) കയർ വ്യവസായത്തിലെ സ്ത്രീകളെ കേന്ദ്രീകരിച്ചുള്ള ഒരു സ്വയം തൊഴിൽ പദ്ധതിയാണ്. കയർ ഫൈബർ ഉൽപ്പാദിപ്പിക്കുന്ന പ്രദേശങ്ങളിലെ ഗ്രാമീണ സ്ത്രീ കരകൗശല തൊഴിലാളികൾക്ക് സ്വയം തൊഴിൽ അവസരങ്ങൾ വാഗ്ദാനം ചെയ്ത് ശാക്തീകരിക്കുകയാണ് ഇത് ലക്ഷ്യമിടുന്നത്. ഗ്രാമീണ വീടുകളിൽ മോട്ടോർ ഘടിപ്പിച്ച ഉപകരണങ്ങൾ ഉപയോഗിച്ച് കയർ നാരിനെ നൂലാക്കി മാറ്റുക, ഗണ്യമായ തൊഴിലവസരങ്ങൾ സൃഷ്ടിക്കുക, ഉത്പാദനക്ഷമതയും ഗുണനിലവാരവും വർദ്ധിപ്പിക്കുക, തൊഴിൽ സാഹചര്യങ്ങൾ മെച്ചപ്പെടുത്തുക, വരുമാന നിലവാരം വർധിപ്പിക്കുക എന്നിവ ഈ പദ്ധതിയിൽ ഉൾപ്പെടുന്നു.

പ്രധാനമന്ത്രി മുദ്ര യോജന (പിഎംഎംവൈ)

പ്രധാനമന്ത്രി നരേന്ദ്ര മോദി ആരംഭിച്ച ഈ പദ്ധതി, വനിതാ സംരംഭകർ നേതൃത്വം നൽകുന്ന കോർപ്പറേറ്റ് ഇതര ചെറുകിട ബിസിനസുകൾക്ക് സാമ്പത്തിക സഹായം നൽകുന്നതിന് വേണ്ടി ലക്ഷ്യമിടുന്നു. അവരുടെ സാമ്പത്തിക ആവശ്യങ്ങൾ അഭിസംബോധന ചെയ്യുന്നതിലൂടെ, ബിസിനസ് വളർച്ചയ്ക്കും വിപുലീകരണത്തിനുമുള്ള തടസ്സങ്ങൾ മറികടക്കാൻ PMMY സ്ത്രീകളെ പ്രാപ്തരാക്കുന്നു.

പ്രൈം മിനിസ്റ്റേഴ്‌സ് എംപ്ലോയ്‌മെൻ്റ് ജനറേഷൻ പ്രോഗ്രാം (പിഎംഇജിപി)

പ്രധാന ക്രെഡിറ്റ്-ലിങ്ക്ഡ് സബ്‌സിഡി സ്കീമുകളുടെ സംയോജനമായ പിഎംഇജിപി സൂക്ഷ്മ സംരംഭങ്ങൾ സ്ഥാപിക്കുന്നതിലും സ്ത്രീകൾക്ക് തൊഴിലവസരങ്ങൾ സൃഷ്ടിക്കുന്നതിലും ശ്രദ്ധ കേന്ദ്രീകരിക്കുന്നു. സാമ്പത്തിക സഹായവും പിന്തുണയും നൽകുന്നതിലൂടെ, ഇത് സ്ത്രീകൾക്കിടയിൽ സംരംഭകത്വവും സാമ്പത്തിക ശാക്തീകരണവും വളർത്തുന്നു.

മഹിളാ സമൃദ്ധി യോജന

മഹിളാ സമൃദ്ധി യോജന (എംഎസ്‌വൈ) സാമ്പത്തികമായി പിന്നാക്കം നിൽക്കുന്നതോ പിന്നാക്കാവസ്ഥയിലുള്ളതോ ആയ സ്ത്രീ സംരംഭകരെ സഹായിക്കാൻ രൂപകൽപ്പന ചെയ്തിട്ടുള്ളതാണ്. സാമൂഹ്യനീതി, ശാക്തീകരണ മന്ത്രാലയത്തിനുള്ളിൽ ദേശീയ പിന്നാക്ക വിഭാഗ ധനകാര്യ വികസന കോർപ്പറേഷൻ്റെ (NBCFDC) കീഴിൽ ആരംഭിച്ച ഈ പദ്ധതി അത്തരം സ്ത്രീകൾക്ക് നേരിട്ടോ സ്വയം സഹായ സംഘങ്ങൾ വഴിയോ (SHGs) മൈക്രോ ഫിനാൻസ് സഹായം നൽകുന്നു.

മഹിളാ ഉദ്യം നിധി സ്കീം

സ്മോൾ ഇൻഡസ്ട്രിയൽ ഡെവലപ്മെൻ്റ് ബാങ്ക് ഓഫ് ഇന്ത്യ (SIDBI) വാഗ്ദാനം ചെയ്യുന്ന ഈ സ്കീം വനിതാ സംരംഭകർക്ക് ഇളവുള്ള പലിശ നിരക്കിൽ സാമ്പത്തിക സഹായം നൽകുന്നു. ഫ്ലെക്സിബിൾ ലോൺ തിരിച്ചടവ് ഓപ്‌ഷനുകൾ ഉപയോഗിച്ച്, ഇത് സ്ത്രീകളെ അവരുടെ ബിസിനസ്സ് ആരംഭിക്കാനും വളർത്താനും പ്രോത്സാഹിപ്പിക്കുന്നു.

ന്യു എൻ്റർപ്രണർ കം എൻ്റർപ്രൈസ് ഡെവലപ്‌മെൻ്റ് സ്‌കീം (നീഡ്‌സ്)

ഡയറക്‌ടറേറ്റ് ഓഫ് ഇൻഡസ്‌ട്രീസ് ആൻ്റ് കൊമേഴ്‌സ് പ്രമോട്ട് ചെയ്‌ത ഈ സ്‌കീം, സ്‌ത്രീകൾ ഉൾപ്പെടെയുള്ള അഭ്യസ്തവിദ്യരായ യുവാക്കളെ ഒന്നാം തലമുറ സംരംഭകരായി ശാക്തീകരിക്കാൻ ലക്ഷ്യമിടുന്നു. മൂലധനവും പലിശ സബ്‌സിഡിയും നൽകുന്നതിലൂടെ, അവരുടെ സംരംഭകത്വ ആ​ഗ്രഹങ്ങൾ സാക്ഷാത്കരിക്കാൻ ഇത് സ്ത്രീകളെ പ്രാപ്തരാക്കുന്നു.