സ്ത്രീകളുടെ അടിവസ്ത്രത്തെക്കുറിച്ച് തുറന്ന് ചർച്ച ചെയ്യുന്നത് നിഷിദ്ധമായി കണക്കാക്കപ്പെട്ടിരുന്ന ഒരു സമൂഹത്തിൽ, റിച്ച കർ എന്ന വനിത ഈ തടസ്സങ്ങളേയും, പൊതുബോധത്തേയും തകർത്ത് ഇന്ത്യയിലെ അടിവസ്ത്ര ബ്രാൻഡുകളെ മാറ്റിമറിക്കുന്ന ഒരു പ്ലാറ്റ്ഫോം ആരംഭിച്ചു. അതാണ് സിവാമെ (Zivame). സ്ത്രീകൾക്ക് സൗകര്യവം, വിശാലമായ ഓപ്ഷനുകളും നൽകാനുള്ള കാഴ്ചപ്പാടുമായി മുന്നേറിയ റിച്ചയുടെ സംരംഭകത്വ യാത്ര പ്രചോദനം നൽകുന്നതാണ്. ഇന്ത്യയിലെ സ്ത്രീകൾ അടിവസ്ത്രങ്ങൾ വാങ്ങുമ്പോൾ നേരിടുന്ന അസ്വസ്ഥതകളും, പരിമിതികളും മനസ്സിലാക്കിയാണ് റിച്ച തന്റെ യാത്ര ആരംഭിച്ചത്. സെയിൽസ്മാൻമാർക്കിടയിലുള്ള പരിമിതമായ അറിവും, സ്വകാര്യതയുടെ അഭാവവും അനുയോജ്യമായ അടിവസ്ത്രം തിരഞ്ഞെടുക്കുന്നതിൽ സ്ത്രികളെ വിട്ടുവീഴ്ചകളിലേക്ക് നയിക്കുന്നതായി റിച്ച മനസ്സിലാക്കി. വിക്ടോറിയസ് സീക്രട്ടിൽ പ്രവർത്തിച്ച അനുഭവത്തിൽ നിന്ന് പ്രചോദനം ഉൾക്കൊണ്ട്, റിച്ച ഒരു ഇ-കൊമേഴ്‌സ് പ്ലാറ്റ്ഫോം രൂപീകരിച്ചു. അതിൽ സ്ത്രീകൾക്ക് മികച്ച തിരഞ്ഞെടുപ്പുകൾ നടത്താനും, താൽപര്യങ്ങൾക്ക് മുൻഗണന നൽകാനും സ്ത്രീകളെ പ്രാപ്തരാക്കുന്ന വിധത്തിലൊന്നായിരുന്നു. ഒരു പരമ്പരാഗത കുടുംബത്തിലെ അംഗമായ റിച്ച ജനിച്ചു വളർന്നത് യുഎസിലാണ്. 2007ൽ എൻഎംഐഎംഎസിൽ നിന്ന് ബിരുദാനന്തര ഡിപ്ലോമ പൂർത്തിയാക്കി. ബിരുദം നേടിയ ശേഷം കുറച്ച് വർഷം ഐടി മേഖലയിൽ ജോലി ചെയ്തു. പിന്നീട് സ്‌പെൻസേഴ്‌സ്, എസ്എപി റീട്ടെയിൽ കൺസൾട്ടൻസി തുടങ്ങിയ കമ്പനികളിൽ ജോലി ചെയ്തു.
സിവാമെ ആരംഭിച്ചത് 2011ലാണ്. ഹീബ്രുവിൽ ‘റേഡിയന്റ് മി’ എന്നർത്ഥം വരുന്ന Zivame എന്ന വാക്കിൽ നിന്നാണ് തന്റെ കമ്പനിക്ക് ഈ പേര് കണ്ടെത്തിയത്. സ്ത്രീകൾക്ക് സുഖകരവും സ്വകാര്യപ്രദവുമായ ഷോപ്പിംഗ് അനുഭവം നൽകുന്നതിനുള്ള ഓൺലൈൻ പ്ലാറ്റ്‌ഫോമായി സിവാമെ മാറി. 5,000 ഡിസൈനുകൾ, 50 ബ്രാൻഡുകൾ, 100 സൈസുകൾ എന്നിവയുടെ അമ്പരപ്പിക്കുന്ന ശേഖരം ഇന്നുണ്ട്. പ്രത്യേക താല്പര്യങ്ങൾക്കനുസരിച്ച് മികച്ച അടിവസ്ത്രങ്ങൾ തേടുന്ന ഇന്ത്യൻ സ്ത്രീകൾക്കിടയിൽ സിവാമെ പെട്ടെന്ന് ക്ലിക്കായി. തുടക്കത്തിൽ സ്ത്രീകൾക്കായുള്ള അടിവസ്ത്രങ്ങളിൽ ശ്രദ്ധ കേന്ദ്രീകരിച്ചെങ്കിലും, സ്ത്രീകളുടെ വസ്ത്രങ്ങൾ, ഫിറ്റ്നസ് വസ്ത്രങ്ങൾ, നൈറ്റ് ഡ്രസുകൾ എന്നിവ ഉൾപ്പെടുത്തുന്നതിനായി കമ്പനി അതിനെ വൈവിധ്യവൽക്കരിച്ചു. വില, ഗുണമേന്മ, ഉപഭോക്തൃ ഫീഡ്‌ബാക്ക് തുടങ്ങിയ ഘടകങ്ങൾ പരിഗണിച്ച് ഉൽപ്പന്നങ്ങളിൽ വൈവിധ്യം കൊണ്ടുവരാൻ റിച്ച തീരുമാനിക്കുകയും, അതിൽ ശ്രദ്ധകേന്ദ്രീകരിക്കുകയും ചെയ്തു. അങ്ങനെ വാങ്ങുന്നവർക്കിടയിൽ വിശ്വാസവും ആത്മവിശ്വാസവും വളർത്താൻ സഹായിച്ചു. സിവാമെയുടെ ഓൺലൈൻ പ്ലാറ്റ്ഫോം ജനപ്രീതി നേടിയതോടെ, സ്റ്റോറുകൾ തുറന്ന് തന്റെ ബിസിനസ് വിപുലീകരിക്കാൻ റിച്ച തീരുമാനിച്ചു.
പൊതുബോധങ്ങളെ മറികടന്ന് മുന്നോട്ട്
അടിവസ്ത്രത്തെ ചുറ്റിപ്പറ്റിയുള്ളതെല്ലാം സാംസ്കാരികമായി കളങ്കം സൃഷ്ടിക്കുന്നവയാണെന്നതിനാൽ തന്നെ, റിച്ച കറിന് അവളുടെ കുടുംബത്തിൽ നിന്നും സമൂഹത്തിൽ നിന്നും വലിയ എതിർപ്പ് നേരിടേണ്ടി വന്നു. എന്നാൽ അതിലൊന്നും തളരാതെ ദൃഢനിശ്ചയവും, വിശ്വാസവും കൊണ്ട് അവരെ മുന്നോട്ട് നയിച്ചു. ഇൻ-ഹൗസ് ബ്രാൻഡുകൾ വികസിപ്പിക്കുന്നതിൽ റിച്ച ശ്രദ്ധ കേന്ദ്രീകരിച്ചു. അടിവസ്ത്രങ്ങളുടെ രൂപകൽപ്പന, നിർമ്മാണം, വിതരണം എന്നിവയ്ക്കെല്ലാം വ്യക്തിപരമായി മേൽനോട്ടം നൽകി. എന്നാൽ, വിമർശനങ്ങളും പ്രാരംഭ വെല്ലുവിളികളും നേരിട്ട്, സിവാമെ എന്ന അതുല്യമായ ആശയം നിക്ഷേപകരിൽ നിന്ന് ശ്രദ്ധ നേടി. 2012 മെയ് മാസത്തിൽ, റിച്ച കർ ആദ്യ ഫണ്ടിംഗിലൂടെ 3 മില്യൺ നേടി. തുടർന്ന് 2013 ഡിസംബറിൽ 6 മില്യൺ ഫണ്ട് നേടി. ഇന്ന്, സിവാമെയുടെ മൂല്യം 681 കോടി രൂപയിൽ കൂടുതലാണ്. 2017ൽ സിഇഒ സ്ഥാനം ഒഴിഞ്ഞെങ്കിലും, റിച്ച കർ ഡയറക്ടർ ബോർഡിൽ തന്റെ സ്ഥാനം നിലനിർത്തുകയും സിവാമെയിൽ തന്റെ ഇക്വിറ്റി നിലനിർത്തുകയും ചെയ്തു. നിലവിൽ റിച്ചകറിന്റെ മൊത്തം മൂല്യം 749 കോടി രൂപയാണ്.
